ശാന്തിയെവിടെ സമാധാനമെവിടെ
ജീവന്റെ അധ:പതനമെത്രയായി!
ഹൃദയം ശൂന്യമാക്കി-
ചുടുനിണമൊഴുക്കി മരവിപ്പിച്ചു
ആളികത്തും കൊലവെറി
ജീവനു വിലയില്ലാതാക്കി.
ആര്‍ക്കു വേണ്ടിയിതെല്ലാം
എന്ത് നേട്ടമിതില്‍ കൊയ്തു?
അക്രമണ ചിന്ത, ആര്‍ത്തി ….
ശമനമുണ്ടാവുമോ ഇതിനൊരിക്കല്?
മനസ്സിന്റെ മാര്‍ദ്ദവം മായ്ച്ചു-
മനസ്സാക്ഷിയില്ലാ കൊടുംകൃത്യങ്ങള്‍
ചെയ്തു കൂട്ടുന്നതോ പൌരുഷം?
കൊല്ലുന്നതും കൊല്ലിക്കുന്നതുമോ
ചുണയും ധൈര്യവും വീര്യവും?
കൊല്ലിക്കുന്നവര്‍ക്ക് യന്ത്രമായൊരു
വെറും കളിപ്പാവ നീ മനുഷ്യാ .
കുത്തും കൊലയും ജീവിതശൈലി-
യാക്കിയ നീ, മരണപ്പെടുന്നവര്‍ക്ക്
എന്നും കാലദൂതന്‍ .
ഭീതിയും തോരാത്ത കണ്ണീരുമായ്
ജീവിക്കുന്നോര്‍ക്ക് പേടിസ്വപ്നവും.
വൈരികള്‍, ക്വട്ടേഷനുകള്‍,
കള്ളപ്പണം കുറ്റകൃത്യങ്ങള്-
അസ്വസ്ഥതയല്ലാതെ
എന്തു നേടിതന്നിവ മനുജ?
ആര്‍ക്കുവേണം കൊലയാളികളെ
ആരു പങ്കിടും നിന്‍പാപകര്‍മത്തിന് ഫലം?
പേടിച്ചും, പാത്തും പതുങ്ങിയും
ഒളിവിലും മറവിലും ഓടുന്ന ജീവിതം;
സുഖനിദ്രയനുഭവിച്ച രാവുകളുണ്ടോ
മദ്യവും ഡ്രഗ്ഗുമില്ലാതെ ശക്തിസംഭരിച്ചുവോ?
സ്വന്തമായി ചിന്തിക്കാന്‍കെല്‍പ്പില്ല
റോബോട്ട് കണക്കെ വെറും യന്ത്രമായ്
കേട്ടത് നടപ്പിലാക്കും നീ മനുഷ്യനോ?
വന്യജന്തുക്കള്‍ക്കു തുല്യം നിന്‍ജീവിതം !
ഉറങ്ങിയും തിന്നും കുടിച്ചും
കൊലചെയ്തും കലഹിച്ചും
കരുണയും സ്നേഹവുമില്ലാതെ
ജീവിക്കുന്നതും മനുഷ്യ ജീവിതമോ?
-എല്ലെൻ-
No comments:
Post a Comment